“အရွယ်လွန် အချစ်”

အလွမ်းသံသရာဖွဲ့
နွမ်းကြမ္မာနွဲ့နဲ့
စခမ်းပြာသာယာမဲ့ပြီး
ခင်ကညာရယ်
တို့တွေ ဇရာဖဲ့ခဲ့ပြီနော်။

ရင့်ရော်အိုမင်း
ပန်းတစ်ပွင့်ညှိုးခြင်းလို၊
တွန့်ကြွေမြေသက်
သစ်ရွက်တစ်ရွက်လို၊
တကယ်ဆိုခန္ဓာပြိုတဲ့ အချိန်ပေါ့။

နုပျိုခြင်းတွေပျောက်
အလှသွေးတွေခမ်းခြောက်ပြီ။

သို့ပေမယ့်ခင်…။
မောင့်အကြင်နာနဲ့
တွယ်မိတဲ့ သံယောဇဉ်က
အစဉ်ထာဝရ နုပျိုနေဆဲ
မဆုံပဲ ခွဲခဲ့ရတယ်ဆိုပေမယ့်
ရင်ခုန်အမြဲ သဲရဲ့နန်းမှာပဲပေါ့…။

ဒီတစ်ခါပြန်တွေ့
ငယ်အနာတွေ တို့မေ့လို့
နှစ်ကိုယ်တွေ့ကြင်ကြင်နာနာ
ညင်ညင်သာသာ ချစ်တေးဖွဲ့
ယုယစွာ အပြစ်မဲ့ပြီး
ယဲ့ယဲ့ကျန်တဲ့ နေညိုချိန်တောင်
မောင်ကတော့လေ…
တကယ်မမှိန်ပဲ
အချစ်အိမ်ကလေး အတူဆောက်ချင်သေးတယ်။ ။



မင်းကြည်ညို